Las viletjaturas del '900
Al principi del secol lhi nobils borgués turinés, ligurs e niçards passavon l’istaa a 600-700 metres en pòsts coma Rocavion; pr’aquò naisson icì 15 vilas liberty, esquasi totas encara abitaas al jorn d’encuei. Dins lo parc de la villa di Conts Salazar, destrucha al temp de la guerra, entre saps e cedres, se tròbon dui esemplars de sequòia de cent ans, catalogats entre lhi arbols monumentals italians. Lo pi aut arriba a 50 metres d’autessa, con una circonferença de 7 metres, l’autre es un pauc pi bas mas a una circonferença de 10,5 metres: venon plantats dal jardinier Giacomo Fantino qu’avia trabalhat en las minieras del Nòrd America e auria portat lhi plantins al retorn en Italia. Ental parc lhi a decò un gigantesc exemplar d’Araucariae, e dui rars, benleu unics exemplars europeus de Thujopsis delabrata, planta japonesa retengua sacra perqué servia mec a la familha reala e per questions religiosas. Lo darrier discendent di Conts Salazar avia ospitat, al principi del Nòu Cents, una jove americana que volia mariar. Lo Cont Salazar puèi decid de mariar una autra frema e la forestiera se fai realizar una casa, encuei " Casa Auxilium ", proprietat de religiosas salesianas.
