Las Parlaas

“Las Parlaas” a Entraigas son la rievocacion de la Passion e Mòrt de Nòstre Senhor, da la preguiera al Getzemani fins a la Sepoltura. Lo drama remonta al Medioevo e es estat rapresentat en la Setmana Santa drant chasque tres ans e puèi cinq; actors del pòst fan lhi divèrs personatges en costum. La recita se fai en la Confraternita de Santa Crotz, ente lhi a lo palc e lhi scenaris. Lo Venre Sant, al drama religiós se jonton autras figuras de la tradiccion del pòst: “lo Timbalier”, que dal matin passa per lo paìs e las ruaas a anonciar lo programa de la rievocacion; “lo Capitani” encharjat dal Prevòst Prior la Diamenja des Palmas, que sus son caval blanc, ajuat da “lo Tenent”, presenta tuchi lhi personatges al Sindic per chamar l’autorizacion per la rapresentacion sacra des Parlaas.

Lhi “Tretze Cavaliers” rapresenton chasq’un un rion, e son encharjats en la Confraternita de S. Crotz dal “Capitani” de l’edicion precedenta. Pòrton frac e feluca e bandieras nieras con una crotz d’argent. Es dich “Lo Tretze” lo premier di Cavaliers, comandant de la Guardia d’Onor a la Sacra Urna. Agut lo permés, lo Cortèu Istòric arriba a la Confraternita de Santa Crotz, ente se fai la sacra rapresentacion en cinq acts en italian e dialect del pòst. A la fin de la sacra rapresentacion se fai la Sepoltura de Nòstre Senhor, procession per las vias del paìs, totas enluminaas. Tuchi lhi actors partecipon, portant lhi instruments de la Passion, e lo pòpol companha l’Urna del Crist chantant lo Miserere e lo Stabat Mater. La sera l’estatua del Crist ven portaa en la Glèisa Parroquiala ente se retròba en adoracion tota la popolacion.